D lawan n uzizwu, iṭṭij yebda ijemmeɛ iẓenẓaren-is, d abuḥru, d lwana deg imesdurar ttefɣen-d ɣer lecɣal-nsen, sufuɣen-d lmal-nnsen ad yeks.
Tilemẓiyin ad ruḥent ad d-agwment, ilemẓiyen ad ruḥen ad d-ḥuccen, imɣaren akwed lwacul ad ɛassen lḥara.
Yal yiwen yessen tawuri-s[1]. Akka I tebna tmetti di tmurt-nneɣ, yal wa yeẓra talast seg id-yuɣal, yal wa yessen lwajeb-is. Tala d tajmaɛt n tsednan, ttṣubunt-d ɣer-s d tirebbuyaɛ, abrid-is yeḍyeq aṭṭas, maɛna yezga yeɛmeṛ s tsekwrin-agi yettawin-yettaran deg-s yal ass.
Icewwiqen, tiɣratin, izlan zgan di lḥara-s. Tiḥdayin, tid-nni ur ɛad yezwiǧen, din id-yettas lmektub-nsent, din itent-senqadent temɣarin. Tiḥdayin timḥeglin[2] zgant lsant timḥarmin[3] n zzit akwed umendil awraɣ.
Taẓult akwed ugusim yezga ɣef udemawen-nsent. Ẓrant belli din kan I zemrent ad leɣdent[4] tiyemmatin n yeḥdayen n taddart, acku di tmurt-nneɣ zwaǧ d cɣel n tlawin.
Tayemmatt; d nettat id tigejdit n wexxam, fell-as I yers kullec, d nettat id tasarut n yal tawwurt, yal ugur d nettat is-d-yettafen tifrat. Ilemẓi ma yewweḍ i tissulya[5], d yemm-as is-d-yettafen tacrikt n ddunit-is, di kra n teswiɛin daɣen, d nettat id-yettafen ula d argaz i yelli-s.
Teẓra anda ilaq ad d-tnadi, teḥṣa anwa ilaq ad d-tciwer, tessen axxam n tfamilt.
Tiṭ n mmi-s ma ters ɣef albaɛḍ n teqcicin di taddart neɣ di tmura, azekka-nni ṣbeḥ ad aweḍen iḍaren-is axxam-nsen. Xas ma di lqern n ddunit I tezdeɣ teqcict-nni, ɣef mmi-s tezmer I tikli, ulac tuzya ɣer deffir, fell-as tezmer ad tezger tiẓegwa ḥafi.
Ahh… a rezg n tyemmatt m’ara twali mmi-s yefreḥ di tudert-is. Akka i d bu-tasa, fell-as ad yali wass anda yensa.
Sɣur: Muccen.
[1] Tawuri = Fonction
[2] Timḥeglin = Adolescentes. Imḥeggel neɣ Anubi = Adolescent
[3] Timeḥremt = Lfuḍa
[4] Lɣed= Séduire.
[5] Tisulya = Zwaǧ, mariage.